about us

    Hope We Three,三人行,顧名思義就係由三個80後、 30+嘅女人,三個由細到大都打打鬧鬧,聚埋一齊又雞啄唔斷嘅姊妹組成。

    我哋三個係埋一齊,可以用相愛相殺嚟形容,即使大家加埋都成百歲,兩個家姐都做咗人哋阿媽,我哋都仲係好似細個咁雞毛蒜皮都可以嘈個不停😅此時阿媽實係果句:睇吓人哋屋企啲兄弟姊妹有冇好似你哋咁?!

    話雖如此,但係我哋又會成日一齊分享唔同嘅嘢。由衣食住行、美容減肥、小朋友嘅教育等等,咩都會一齊分享。有時行行下街見到有正嘢,第一時間就會互相通知:哇,呢個特價喎,一齊夾份買囉!呢個我之前有用過,好好用,你哋要唔要試吓?呢個啱曬你哋仔女喎⋯⋯基本上,我哋就係咁「相愛相殺」😆

    而近年我哋少咗行街買嘢,多咗網上購物,當中肯定有試過中伏,但亦因為大家經常互相提點,又真係買到好多又實用又正嘅野。其實諗吓,簡單一個開心share,一個真心分享,除咗收穫到好用、超值嘅嘢之外,仲維繫到大家嘅關係、互相都有好多得著。

    於是我哋構想,如果有個平台將我哋嘅試過嘅各種好物分享俾多啲人知,咁大家就可以減少中伏機會,同埋可以好方便咁搵到啱自己嘅嘢。所以,我哋就成立咗呢個 Hope We Three-三人行。

    我哋好希望透過我哋三個人嘅小小力量,分享多啲真心好用同有價值嘅產品俾更多人認識。希望大家都好似我哋三姊妹一樣,一齊開心share,一齊收穫更多!